Siglir tar il cuntegn

Header

cuntegn

1. retschertga da votaziuns In cler Gea per scumandar reclama per tubac

Set emnas avant las proximas votaziuns n'èn las Svizras ed ils Svizzers anc betg s'occupads cun las votaziuns dals 13 da favrer. Quai mussa la retschertga da l'institut gfs.berna. Tuttina datti prims trends per las quatter fatschentas federalas.

Legenda: RTR

Sch'i fiss vegnì votà gia ils 25 da december 2021, fiss l'iniziativa per in «scumond da far reclama per tubac» vegnida approvada cun 73% da las vuschs, fertant ch'ina maioritad relativa avess sbittà l'iniziativa per in «scumond d'experimentar cun animals ed umans» (58% Na), avessi er dà in Na a l'aboliziun da la taxa da bul (49%). Tar il pachet da mesiras per las medias èn ils participants e las participantas stadas divididas (48% Gea e 48% Na). La participaziun fiss cun 41% stada relativamain bassa.

Gea per l'iniziativa per scumandar reclama da tubac

Legenda: RTR

L'iniziativa per scumandar reclama da tubac cumenza il cumbat da votaziun cun in grond avantatg. Ils aderents da l'iniziativa han l'avantatg che lur arguments chattan blera chapientscha, fertant che nagins arguments dals adversaris na vegnan da persvader ina maioritad. Relevants sajan en emprima lingia trais arguments:

  • Igl è consequent da scumandar la reclama per uffants, sch'er la vendita è scumandada.
  • Tala reclama è condemnabla.
  • La protecziun da giuvenils è in'obligaziun da la societad.

Da vart dals adversaris survegn l'argument davart l'economia almain ina maioritad relativa da 49%. Ils arguments che l'inizitiva limiteschia la libertad economica e che la protecziun entras il status quo sajan bunas avunda, na chattan nagina maioritad. La furmaziun da l'opiniun è dentant anc sin in bass nivel. Quai munta che la campagna da votaziun po anc midar l'opiniun da persunas che n'èn anc betg segiras tge votar.

audio
La politologa Martina Mousson declera il sustegn
03:15 min, Actualitad dals 07.01.2022.
laschar ir. Durada: 03:15 minutas.

Scumond d'experimentar cun animals fiss refusà

Legenda: RTR

Fertant che 48% dals participants e las participantas fissan encunter il scumond d'experimentar cun animals, èn total 66% dals dumandads persvas che l'iniziativa vegn refusada. Tar questa fatschenta è il foss tranter las schlattainas fitg grond. 60% da las dunnas, dentant be 33% dals umens vulan votar per l'iniziativa.

Tar questa fatschenta n'è la furmaziun da l'opiniun dentant anc betg uschè lunsch. Be radund 45% dals participants han gia in'opiniun tscherta. Quai munta che la campagna da votaziun ha anc bunas schanzas da midar opiniuns tar quellas persunas che n'èn anc betg segiras.

Maioritad vul salvar taxas da bul

Legenda: RTR

49% dals dumandads na vulan betg abolir la taxa da bul, quai è bain be ina maioritad relativa, dentant han ils adversaris da la fatschenta be 7 puncts procentuals avantatg sin ils aderents.

En questa emprima fasa, ch'è anc baud en il cumbat da votaziun, èn 49% dals participants e las participantas segirs tge ch'i vulan votar. Dentant è ina part relativamain auta da 9% anc indecis. Quai discurra per in stan mediocher tar la furmaziun da l'opiniun. Er ils arguments sajan plitost flaivels tar questa fatschenta. Uschia han las campagnas bler spazi da giugar.

Populaziun dividida tar pachet da mesiras per las medias

Legenda: RTR

Il sustegn per il pachet da mesiras per las medias è ferm dependent da la lingia politica. Persunas da strusch a la Verda, la Partida socialdemocratica e la Partida verd-liberala, èn per il pachet. Persunas che stattan datiers al center er. Simpatisants e simpatisantas da la Partida liberaldemocratica e da la Partida populara svizra sco er persunas senza partida, sajan per il pli encunter il pachet.

I dat qua en egl che sur tut participantas e participants da regiuns da la champagna èn per il pli encunter il pachet, fertant che pli bleras persunas da regiuns urbanas èn persuenter.

La retschertga

Avrir la box Serrar la box

L'institut gfs.berna ha fatg la retschertga per incumbensa da la SRG SSR. L'institut ha dumandà 10'083 votantas e votants tranter ils 17 da december 2021 ed ils 3 da schaner 2022. La quota da sbagl munta a ±2,8 puncts procentuals.

RTR novitads 06:00

Artitgels legids il pli savens

Scrollar a sanestra Scrollar a dretga