Tge dovri per scriver in text litterar? Ina buna idea, ni meglier il squitsch da stuair scriver? In lieu quiet u musica u perfin baldori? Blers e buns cafés, vin ni aua? Las duas auturas Viola Cadruvi e Romana Ganzoni e l’autur Leo Tuor han survegnì l'incumbensa da scriver in text cun il titel: «Dis da litteratura».
Viola Cadruvi va en ses café preferì. Ella dovra in café, in cornet cun tschigulatta, ses laptop, il carnet da notizias e ses uregliers. Musica en las ureglias è per ella indispensabel per savair scriver, per sa sfundrar en l'atmosfera dal text. Mintgin da ses texts ha sia atgna playlist.
Leo Tour scriva en ses biro circumdà da plunas retschas da cudeschs, cudeschs sin curunas, cudeschs giun plaun, cudeschs sin maisa, ina tschuetta da lain e corns da chamutschs sur las curunas da cudeschs. Scriver sin commando e sin termin n’è betg sia chaussa.
Cuntrariamain Romana Ganzoni. Ella appreziescha incumbensas da scriver ed ina concreta deadline. Ses lieu da lavur è savens ses biro. Qua stà mintga fegl, mintga fieuter en ses lieu, urden perfetg, tut piccobello.
Ina giada scrit l'emprima versiun dal text vegn la crisa, era numnà il «crampf». Curreger sbagls, controllar che tut constat, scursanir... Tuts trais elavureschan navidas lur texts. Ma era quella lavur dovri per ch'il text saja finì per propi.
In pèr emnas pli tard s'entaupan Romana Ganzoni, Viola Cadruvi e Leo Tour e preschentan in a l'autra lur texts. Il titel è il medem, il resultat totalmain varià. In titel, trais persunalitads, trais texts. «Computer, cafés e crisas – l'art da scriver»: In film sur da la genesa d'in text.