Siglir tar il cuntegn

Header

cuntegn

Medias 2021 Episoda dubla dals «Cuntrasts»: Il tschêl da Samedan

En la cuntrada da l’Engiadin’Ota cumenza ils onns 1980 in drama: Sut l’influenza dal moviment da la giuventetgna turitgaisa sa derasa il heroin. Il destin tragic da blers giuvenils divida la regiun enfin oz. «Il tschêl da Samedan» dad Ivo Zen rumpa per l’emprima giada il silenzi.

La cuntrada da l’Engiadin’Ota è en ils onns 1980 e 1990 lieu d’acziun d’ina tragedia ch’è tabuisada enfin oz. Inspirada da las inquietezzas a Turitg, ha la giuventetgna rebellà cunter las reglas tradiziunalas da la cuminanza. La plazza communala da Samedan è daventada il lieu d’inscunter per la cultura da la giuventetgna engiadinaisa. Sper far musica e fimar erva da cumpagnia, è il heroin daventà ina part da la vita dals giuvenils. La dependenza da drogas e la mort dals agens uffants è in schoc per l’entira regiun. Nunpussanza e dar la culpa sparta la cuminanza dal vitg.

Tge è ì crutsch?

En il film da duas parts dals «Cuntrasts» persequitescha il Jauer Ivo Zen la dumonda, tge ch’è ì crutsch da quellas uras. En «Il tschêl da Samedan» envida el ses public sin in viadi en il vitg en l’Engiadin’Ota e discurra cun ils carstgauns che sa regordan, co che amias ed amis cumpravan drogas a Turitg e murivan suenter da quellas. Geniturs pertutgads raquintan, co ch’els han pers lur uffants pervia da las drogas. Er anteriuras persunas dependentas vegnan a pled. «Il tschêl da Samedan» rumpa per l’emprima giada il silenzi ed instradescha in process da reconciliaziun.

Intimà da Radiotelevisiun Svizra Rumantscha ha il cineast Ivo Zen realisà ses film «Il tschêl da Samedan» en cooperaziun cun RTR.

Cuntrasts: «Il tschêl da Samedan»

Avrir la box Serrar la box

Dumengia, ils 05-09-2021 ed ils 12-09-2021, a las 17:25 sin SRF 1 (cun suttitels tudestgs) u sin Play RTR

Repetiziuns:

sonda, ils 11-09-2021, a las 17:10 sin SRF 1

sonda, ils 18-09-2021, a las 17:10 sin SRF 1

Artitgels legids il pli savens