En noss mintgadi essan nus confruntads e confruntadas cun bleras linguas: ils idioms rumantschs, las linguas svizras e quellas dad esters che vivan en Svizra. Ma lura er cun la lingua catolic-refurmada, la lingua dals giuvens e quella dals pli vegls, da persunas da differents origins u da differentas opiniuns – ina sfida da chapir in l’autra.
Co che quai succeda tenor la bibla e co che quai po succeder ozendi vegn tematisà en il servetsch divin ecumenic or da la baselgia catolica da Sagogn. Quest servetsch divin vegn emess dumengia da Tschuncaisma, ils 31 da matg 2020, a partir da las 10:00 al Radio RTR ubain online sco video on demand sin la pagina rtr.ch. Il predi vegn tegnì da la plevonessa refurmada Anja Felix-Candrian ensemen cun Flurina Cavegn-Tomaschett che è assistenta pastorala catolica.