Medias 2020 - «Metta da fein»: prima seria-web rumantscha ficziunala

Films e serias èn «service public» en il vair senn dal pled. La SRG SSR investescha en serias svizras ed augmenta successivamain quest dumber. Da nov vegnan las producziuns emessas e producidas en tuttas regiuns linguisticas da la Svizra – uschia era tar RTR. Grazia a quest engaschament po RTR producir il 2020 sia emprima seria-web ficziunala rumantscha. Per RTR è quai ina gronda schanza da pudair producir ina seria che n’è betg liada vid in temp d’emissiun fix, ina pussaivladad da promover il rumantsch sur ils cunfins e da sa posiziunar sco vitrina da la Svizra rumantscha.

La seria «Metta da fein» vegn preschentada a partir dals 13 da december 2020 sin ils chanals rtr.ch e sin Play RTR. Medemamain vegn ella publitgada sin Facebook, Instagram e Youtube e sin Play Suisse, la nova plattafurma naziunala da la SRG SSR.

L’istorgia da la seria

En in vitget en la Surselva vegnan regularmain chattads animals cun chommas tagliadas giu. La pitschna cuminanza è tementada. Entant che plirs abitants crain vi d’in mitus, emprova il policist da sclerir il cas, quai però senza success. Ils mazzaments s'augmentan sco er la disfidanza dals abitants dal vitg. La seria da mazzaments finescha cun ina catastrofa a la festa dal vitg.

RTR collavura per la realisaziun da la seria-web cun la firma da producziun «Filmgerberei GmbH». Quest team planisescha e producescha la seria dal casting fin al tagl final e lavura stretgamain ensemen cun il manader dal project, Flavio Deflorin da RTR.