Siglir tar il cuntegn
Inhalt

Medias 2018 Rusna da stad? Betg tar Radiotelevisiun Svizra Rumantscha

La stad è medialmain in temp cun in’agenda pli leva, in temp dad ir autras vias che durant il rest da l’onn. Uschia porscha RTR era questa stad in program spezial. Il program da stad cumenza sonda, ils 30 da zercladur 2018, e cuntinuescha fin dumengia, ils 19 d’avust 2018.

Il program da stad cumenza sonda, ils 30 da zercladur 2018, e cuntinuescha fin dumengia, ils 19 d’avust 2018.
Legenda: Il program da stad cumenza sonda, ils 30 da zercladur 2018, e cuntinuescha fin dumengia, ils 19 d’avust 2018. Colourbox

Curt, frestg e sin il punct: L’emissiun da televisiun «sil punct» infurmescha e tegna sin il current era durant la stad. Tras l’emissiun mainan Livio Foffa, Oceana Galmarini, Corina Schmed ed Isabella Wieland. A moda viva e cumpacta vegn rapportà da quai che capita en Svizra Rumantscha ed en il Grischun. «Sil punct» vegn emess durant la stad da glindesdi fin venderdi, a las 17:45 sin SRF1.

«Mia vita – mia musica»: in program per il cor
Durant la stad substituescha l’emissiun «Mia vita – mia musica» l’emissiun «Profil». En mintga emissiun vegn in giast a preschentar sia musica, vul dir ils tocs che han gì ina muntada speziala en sia vita, ch'al han accumpagnà en bels e trists muments. Ditg curt, las chanzuns che stattan a cor ad el. «Mia vita – mia musica» vegn emess durant la stad mintga sonda, a las 09:03 en il Radio Rumantsch.

«Expediziun Grischun»: a la scuverta da lieus pauc enconuschents
Nua è Putz? E nua è insumma Buseno? Durant la stad scuvran las redacturas ed ils redacturs da RTR ils lieus pauc enconuschents en il Grischun talian ed en il Grischun tudestg. RTR inscuntra ils indigens, e forsa er inqual turist, e tschertga las istorgias che vegnan raquintadas en il vitg e sur dal vitg. Plinavant datti mintga venderdi da las 06:00 fin las 10:00 in’emissiun live dal lieu ch’è vegnì scuvert durant l’emna.

«Vita e cretta»: in program per l’olma
En l’emissiun «Vita e cretta» vegnan durant la stad reprendidas tematicas discutadas ils davos onns en l’anteriura emissiun «Forum». En quest’emissiun han experts referì davart tematicas religiusas ed etic-filosoficas. «Vita e cretta» vegn emess mintga dumengia, a las 08:03, en il Radio Rumantsch.

«Cuntrasts»: in program per emprender d’enconuscher la Svizra
Sut il titel «Nossa Svizra» mussa l’emissiun «Cuntrasts» duas serias en duas parts. L’emprima part mussa quatter films documentars dals collegas da la RSI, ina seria panoramica tranter auter davart glatschers, chavorgias e fradaglias. En la segunda part vegn emessa ina seria cun il titel «Nus essan la Svizra» che purtretescha persunas sco ti ed jau e lur mintgadi en tut las quatter regiuns linguisticas dal pajais. «Cuntrasts» vegn emess mintga dumengia, a las 17:25, sin SRF1.

«Marella»: kino per las ureglias
La «Marella» repeta emissiuns remartgablas dals ultims trais onns – emissiuns ch’èn s’approfundadas en tematicas istoricas, culturalas u economicas. L’emissiun «Marella» vegn sco usità emessa mintga dumengia, a las 09:03, en il Radio Rumantsch.

L’entir program da stad da RTR è sco adina accessibel online sin rtr.ch, sin las plattafurmas socialas ed en l’app Play RTR.