Siglir tar il cuntegn
Inhalt

Medias 2018 «Rezia Libra» rapinescha cusseglier federal

En il rom dal «SRF Comedy-Frühling» emetta RTR dals 9 fin ils 13 d’avrigl ina cumedia rumantscha. Las tschintg parts à trais minutas vegnan mintgamai mussadas suenter il «Telesguard» a las 17:50 sin SRF1 ed a las 20:00 sin SRF2.

Rezia Libra.
Legenda: Rezia Libra. RTR

La cumedia «Rezia Libra» mussa co ch’ils cumbattants Niculin (Lorenzo Polin), Mengia (Marina Blumenthal), Placi (Claudio Spescha) e la scheffa Annatina (Silvana Peterelli) emprovan da deliberar la Rezia dals «Unterländeruns». Els han gia empruvà differentas chaussas – i saja be menziunà lufs e «Putsch-Dermont» – mo success n’han els anc betg gì. La Rezia è anc adina sut il giuf.
Il plan actual è cler: rapinar in commember dal Cussegl Federal e pretender la libertad da la Rezia. Realisar quai n’è però betg uschè simpel. Almain per Mengia betg, ch’è in pau sceptica, perquai che Placi n’ha anc mai dumagnà insatge.