Oriundamain era il plan da Patricia Scarpatetti da Cunter:
- Ir a Honduras,
- s’engaschar per uffants en miseria e
- turnar suenter in onn.
Il voluntariat en ina chasa d’uffants ha dentant midà tut. Suenter in onn è ella bain turnada en Svizra, il cor dentant è restà en l’America centrala. Ella è returnada a Honduras ed ha fundà in’atgna chasa d’uffants.
Mamma per 36 uffants
Oz, 10 onns pli tard, viva ella cun 36 uffants a San Pedro Sula, ina da las pli privlusas citads dal mund. Malgrà che lur dachasa è circumdà da mirs e fils d’atschal, è quai per Patricia Scarpatetti l’insla dal cletg – cun il num «Yo quiero ser». Qua vul ella dar ina nova schanza ad uffants che han per part ina istorgia tragica.
Educar ils uffants è mo ina da las lavurs. Ella è tgirunza, psicologa, organisatura, administratura e cumbatta per ils dretgs dals uffants avant dretgira. Pudair gidar n’è per ella betg ina lavur, mabain in privilegi. In che dovra blera energia e va magari vi da la substanza. RTR ha accumpagnà Patricia Scarpatetti durant sia lavur.
Il film da l’emissiun «Cuntrasts» vegn mussà sco suonda:
Dumengia, ils 17-12-2017, 17:25 sin SRF 1 ubain sin www.rtr.ch/play
Repetiziuns:
sonda, ils 23-12-2017, 17:10 sin SRF 1