Siglir tar il cuntegn

Medias 2017 “Flutgets” è il pled rumantsch da l’onn 2017

Glindesdi, ils 18 da december, ha RTR puspè tschertgà il pled rumantsch 2017. Da las passa 100 propostas è la finala vegnì tschernì il pled “flutgets” ch’ins po duvrar per floccas per il “Müesli”, per ils “Spätzli’s”, per scrottas da naiv ubain per in nivel tut spezial (Altokumulus).

Flutgets è il pled rumantsch 2017.
Legenda: Flutgets è il pled rumantsch 2017. RTR

La giuria che sa cumpona da Gion Nutegn Stgier, schurnalist ANR, Anna-Alice Dazzi, linguista RTR, ed Anita Capaul, manadra Chasa Editura Rumantscha, ha tschertgà ensemen cun il public da RTR il pled da l’onn 2017. Tant la giuria sco era il public han la finala gì ina cumpart da 50% tar la tscherna finala. “Flutgets è in vegl pled che nus avain emprestà dal tudestg (Flocke) ed integrà fitg bain en noss linguatg. El exista gia daditg ed è in pled fitg productiv, perquai ch’el chatta adina novas significaziuns e perquai ch’el funcziuna en tut las regiuns rumantschas”, di la linguista e commembra da la giuria Anna-Alice Dazzi.

Il pled “flutgets” è vegnì inoltrà da Margrit Rufer-Cahenzli da Münsingen/BE. “Flutgets” suonda sin “barbagiat” ch’è stà il pled da l’onn 2016.