Causa la sentenzia dal Tribunal federal davart la taglia sin la plivalur e pervi da la part augmentada da las taxas per emetturs regiunals sto la SSR spargnar davent dal 2016 40 milliuns francs l’onn. Quai cunzunt tar l’administraziun, l’informatica e la producziun. Er reducziuns dal program èn inevitablas. Ins sto far quint cun ina reducziun da var 250 plazzas. La SSR vegn a consultar collavuraturas e collavuraturs, il cader ed il sindicat SSM. Ella vegn a tractar davart in plan social fair. Reservas per la reducziun da plazzas e custs supplementars causa la taglia sin la plivalur pudessan chaschunar il 2015 in deficit considerabel. 2016 vul la SSR puspè scriver cifras nairas.
Ina gruppa da lavur cun represchentantas e represchentants da tut las regiuns linguisticas ha elavurà ils detagls dal program da spargn. Suenter consultaziun cun il cussegl d’administraziun, ha la direcziun approvà il catalog da mesiras.
Il program da spargn tutga tut las regiuns linguisticas e secturs d’interpresa, e succeda prioritarmain en l’administraziun, l’informatica e la producziun. Er reducziuns dal program èn inevitablas. La SSR fa quint che var 250 plazzas stoppian vegnir stritgadas en connex cun las mesiras da spargn.