Il pled rumantsch da l'onn 2015 è «schischuri»

In pled che tuna bain, ma munta insatge mal, uschia la giuria da l’acziun #rtrpled15 en si’argumentaziun. Ella ha tschernì il pled rumantsch da l’onn 2015 ord exactamain 130 differents pleds inoltrads.

Il quintet da la giuria: Benedetto Vigne, Arnold Rauch, Anna-Alice Dazzi, Annetta Zini e Renzo Hendry.

Legenda da maletgs: Il quintet da la giuria: Benedetto Vigne, Arnold Rauch, Anna-Alice Dazzi, Annetta Zini e Renzo Hendry. RTR

Da pleds omnipreschents sco «corrupziun» e «fugitivs» enfin a pleds quasi na betg pli preschents sco «rimpicuni» (persuna mez durmentada - Sent) ni «garlogn» («Ohrwurm» – Rueun) – las propostas da las audituras ed ils auditurs da RTR per il pled rumantsch dal 2015 èn stadas uschè sgiagliadas sco l’onn che è prest passà. En tut èn rivadas 130 propostas, tantas sco anc mai. Nagina missiun simpla per la giuria da #rtrpled15 da sa decider per il pled. Duas uras han las testas fimà, lura era la tscherna dal «schischuri» clera per Benedetto Vigne, Arnold Rauch, Anna-Alice Dazzi, Annetta Zini e Renzo Hendry.

«Schischuri» ni il stadi dal mund l’onn 2015

Schischuri – il Pled rumantsch 2015.

Legenda da maletgs: Schischuri – il Pled rumantsch 2015. RTR

Tenor il quintet da la giuria è «schischuri» in pled che tuna bain, munta dentant insatge mal: «El descriva l’in tranter l’auter (la confusiun) che regia sin quest mund pli quader che radund».

Ina giuria – 3 menziuns spezialas

Che tscherner 1 da 130 pled n’è betg simpel mussa la categoria da las menziuns spezialas. Dal sun da trais ulteriurs pleds era la giuria uschia intgantada, ch’ella na vuleva betg tralaschar els:

  • stgavo – per reactivar in bel vegl bainvegni rumantsch
  • fluppa – per introducir in slang surmiran per la marusa
  • bitscharola – in neologissem per quai che resta, sch’il stgavo cun la fluppa è memia intensiv («Knutschfleck»)