Siglir tar il cuntegn

Header

cuntegn

Occurrenzas Premiera dal film «onn per onn pli paucs»

RTR envida a la premiera dal film da Bertilla Giossi. La premiera ha lieu ils 07 da mars 2019 a las 20:00, en chasa da scola Curaglia.

L’onn 1965 surpiglia il scolast Linus Beeli las classas dal stgalim bass a Curaglia en Val Medel. En l’emprima classa ha el 25 uffants. Var 50 onns pli tard, dapi l’atun 2017, è la chasa da scola vida. Ils uffants da la val van or a Mustér a scola, ed er Evelina Giger, la davosa scolasta a Curaglia, va or da la val a dar scola.

chor
Legenda: RTR

Ina sumeglianta sort ha la Societad da musica Medel/Lucmagn. Ils musicants e las musicantas mancan, l’october passà vegn la societad perquai schliada. Ils instruments èn mess a mantun si surchombras, las unifurmas èn en stgaffa, pachetadas en plastic. Era tar la mastergnanza in maletg sumegliant. I mancan lavurers. La vischnanca tschertga dapi dus onns in bostger ed il garaschist Felix Venzin in successur per sia interpresa.

Nagina scola, nagina musica, mancanza da lavurers, trais fatgs ch’han tuts trais la medema raschun e consequenza: la depopulaziun. En tut las regiuns rumantschas è la populaziun sa sminuida ils davos onns, ma nagliur uschè ferm sco en la Val Medel. Ils davos 10 onns ha la vischnanca da Medel pers 17% da ses abitants. Oz vivan anc 366 persunas en la val.

Tge munta questa digren per quellas e quels ch’èn restads? Tge consequenzas ha la depopulaziun per la vita da mintgadi? Co resentan las Medelinas ed ils Medelins lur sort?

Onn per onn pli paucs – in film sur da sperditas, schanzas e curaschi.

Suenter il film discurran Rico Tuor (president communal Medel/Lucmagn) e Stefan Forster (ZHAW Vargistagn) davart il svilup demografic en las Alps.

Il film en televisiun

Avrir la box Serrar la box
Legenda: RTR

Ils «Cuntrasts» emettan il film

  • dumengia, ils 10-03-2019, 17:25 (SRF 1, cun suttitels tudestgs)
  • ubain sin rtr.ch/play

Artitgels legids il pli savens