Siglir tar il cuntegn

Header

video
Play Suisse – la nova plattafurma da streaming
Or da Trailers dals 07.11.2020.
laschar ir
cuntegn

Nova plattafurma da streaming Play Suisse – Scuvrì la Svizra da nov

Play Suisse – uschia sa numna la nova plattafurma da streaming da la SRG SSR. Ina plattafurma, sin la quala Vus chattais serias, films e documentaziuns da tut las regiuns da la Svizra. Quai tut en Vossa lingua e cura e nua che Vus vulais.

Play Suisse As porscha il meglier da las atgnas producziuns e da las coproducziuns da RTR, RSI, RTS e SRF - per l'emprima giada insumma senza barrieras linguisticas. Qua chattais Vus numnadamain films, serias e documentaziuns, reportaschas e perlas or da l'archiv en lingua originala cun suttitels tudestgs, franzos e talians. Ina selecziun da contribuziuns è disponibla era cun suttitels rumantschs.

Persunalisà per Vus

Play Suisse accentuescha la persunalisaziun e las recumandaziuns: grazia ad in login emprenda Play Suisse d'enconuscher Vossas preferientschas ed As porscha cuntegns ch'èn interessants per Vus. Cun in catalog structurà tenor temas e sistems da recumandaziun persunalisads As envida Play Suisse da scuvrir purschidas dad autras regiuns linguisticas - fin ussa nunenconuschentas. Nus desistin d'ina logica commerziala e promovain enstagl ina purschida da programs plurilingua e multifara.

Play Suisse
Legenda: Play Suisse SRG SSR

In dachasa per istorgias da la Svizra

La purschida, che cumpiglia l’entschatta 1000 titels, è vegnida selecziunada cun premura e metta l'accent sin documentaziuns e serias che tractan temas relevants per la societad e preschentan cuntegns inspirants e divertents. En pli datti er ina vasta paletta da films svizzers e serias ficziunalas. Concerts porschan a Vus muments magics da la ritga scena da musica da la Svizra. Puncts culminants culturals e festivals da film chattan in nov dachasa digital.

En il catalog èn resguardadas producziuns da tut las parts dal pajais, dals «Cuntrasts» da RTR a la «Storia» italofona fin al «Temps présent» da la Svizra franzosa e l'emissiun «Einstein» da la Svizra tudestga, per numnar mo in pèr exempels. L'access è intuitiv sur ils temas che interesseschan Vus.

Per rumantsch chattais Vus il mument radund 50 titels dals «Cuntrasts», producziuns da musica da «8x15», il film rumantsch «Amur senza fin» ed inqual films cun suttitels rumantschs sco per exempel «Gotthard», «Frontaliers disaster» e «Ma vie de Courgette». A partir dals 13 da december 2020 vegnis Vus lura er a vesair la seria-web ficziunala «Metta da fein» sin Play Suisse.

La plattafurma pudais Vus scuvrir sin www.playsuisse.ch, il link avra en ina nova fanestra.

Artitgels legids il pli savens

Scrollar a sanestra Scrollar a dretga