Ina entira dinastia d’artists vegn da la Bregaglia: La famiglia Giacometti. La cuntrada ha furmà ils Giacomettis ch’eran cultivads e cosmopolits. Il barat cun autras culturas era ina part impurtanta da lur vita. La convivenza famigliara intensiva ha creà ina premissa extraordinaria per il svilup artistic dals uffants. Tge è il misteri dal success da questa famiglia? Il film en duas parts da la reschissura Engiadinaisa Susanna Fanzun suonda ils fastizs da la famiglia. El mussa cun las ovras d’art dals Giacomettis en il cor da la famiglia e sco ils Giacomettis han vivì e vesì lur mintgadi.
Annetta Giacometti: Ina dunna cun influenza
Il raquint vegn cumplettà cun citats or da brevs per part nunenconuschentas e cun intervistas cun perditgas dal temp, expertas ed experts. Il film sa differenziescha dad auters cun quai che la reschissura raquinta l’istorgia cun in’egliada feminina. Ella reflectescha la rolla centrala da la consorta e mamma Annetta Giacometti e sia influenza sin ses um ed ils uffants talentads: Alberto Giacometti è vegnì in artist iconic, Diego in artist enconuschent da mobiglias, Bruno architect ed Ottilia empermetteva da daventar in’artista textila talentada. L’influenza da la venerada mamma n’è betg da sutstimar.