Siglir tar il cuntegn

2015 Accents 3

Cineasts rumantschs - u l’autra perspectiva Era sch’i dat mo paucs films da kino per rumantsch, datti ils cineasts rumantschs. E quels collavuran cun Radiotelevisiun Svizra Rumantscha. L’istorgia d’ina cooperaziun fritgaivla.

Dapi 15 onns profitan las cineastas ed ils cineasts rumantschs sco era RTR dal Pacte de l’audiovisuel. Quai è ina cunvegna tranter la SRG SSR e las differentas associaziuns d’interess da la branscha da film en Svizra. L’intent central è da promover la preschientscha e la qualitad dal film svizzer. La SRG SSR sustegna onn per onn cun passa 20 milliuns francs mintgamai var 200 films da televisiun e kino en tut las quatter linguas naziunalas.

Per l’ina s’engascha ella sco coproducenta e per l’autra è ella in chanal da distribuziun impurtant per ils films da cineastas e documentarists libers en Svizra. Uschia emettan er ils Cuntrasts dad RTR, sper ils films realisads da nossa squadra en chasa, mintg’onn var tschintg fin sis films d’auturs libers. Entant che noss collegas da las autras regiuns han la pussaivladad da sa laschar inspirar u lura cumprar producziuns estras en Germania, la Frantscha u l’Italia, èn per RTR las producziuns dal Pacte ina da las paucas pussaivladads da barat. E viceversa è RTR per cineasts rumantschs pli u main l’unica plattafurma per cuntanscher directamain in public rumantsch.