Siglir tar il cuntegn

Header

Navigaziun

cuntegn

2014 Accents 4

Esser averts per novas tecnologias ed esser stricts quai che reguarda ils principis schurnalistics: ina sfida – che RTR accepta cun gust!

«Ti sco directura giuvna...»

I dat intginas dumondas, a las qualas jau, sco «directura giuvna», hai adina puspè da respunder. Ina pertutga il svilup da multimedia. Intgins spetgan para che la «multimedialisaziun totala» saja mia unica «missiun» tar RTR. Quels stoss jau oramai dischillusiunar: la renovaziun e l'innovaziun èn bain process absolut centrals per nus.

Medias consumesch’ins pli e pli a moda mobila – via telefonin u tablet. RTR vul era respunder al basegn da ses public, quai tenor il motto strategic «RTR è nua ch’il public è». Quest process ha però be valur, sche nus tgirain cun premura er en l'avegnir la qualitad da noss products schurnalistics.

Sco chasa da medias cun in’incumbensa publica dastga il public spetgar da RTR lavur d’auta professiunalitad e credibilitad, pia ch’ils fatgs che nus publitgain sajan corrects ed equilibrads, che persunas cumpetentas tschernian ed elavurian temas essend conscientas da lur responsabladad. Per rinforzar anc pli fitg la qualitad ha RTR intensivà marcantamain la scolaziun ils ultims onns – per numnar be in exempel. Esser averts per novas tecnologias ed esser stricts quai che reguarda ils principis schurnalistics: ina sfida – che nus acceptain cun gust!