Siglir tar il cuntegn
Inhalt

2014 Accents 3

L’impurtanza dal service public per la Svizra rumantscha.

Societad purtadra da RTR

La SRG.R è la societad purtadra da RTR Radiotelevisiun Svizra Rumantscha. Ensemen cun las societads da la Svizra tudestga (SRG.D), da la Svizra franzosa (RTSR) e da la Svizra taliana (CORSI) furma ella la SRG. La SRG SSR è in’uniun privata cun in'interpresa da medias che vegn manada tenor ils principis d’ina societad anonima.

Ella ha in'incumbensa specifitgada da la Confederaziun: il servetsch public. La SRG sto cuntanscher la populaziun en las quatter linguas naziunalas, sto contribuir a la pluralitad d’opiniuns, mussar la diversitad culturala ed esser independenta d’interess politics ed economics.

Per quella lavur survegn la SRG SSR in sustegn finanzial or da las contribuziuns che la BILLAG incassescha. 70% da las entradas da la SRG derivan da la Svizra tudestga che survegn puspè enavos 45%. Il rest vegn investì per la realisaziun dals programs da radio e televisiun en Svizra franzosa, Svizra taliana e Svizra rumantscha – in bel exempel per la solidaritad en noss pajais.

Grazia a RTR – cun sia offerta da radio, televisiun ed internet en noss tschintg idioms ed ina part (surtut en la rait) er en RG – n’èn betg mo vegnidas construidas punts tranter las regiuns rumantschas, RTR ha era contribuì al svilup da la lingua e cultura rumantscha en general.

  • Facit 1) senza contribuziuns a la BILLAG nagina SRG SSR.
  • Facit 2) senza SRG SSR nagin RTR.
  • Facit 3) senza RTR depauperisaziun da la lingua e cultura rumantscha.