«Dir bler cun paucs pleds, en in pèr maletgs»
Tschuncanta onns! Quai è in mez tschientaner che RTR e la SRG SSR sa participeschan al svilup, a la renconuschientscha e surtut ad ina cultura rumantscha viva al monitur.
Jau sun «Fribourgeois». E «Freiburger». Ma i na fiss betg simpel da dir quai en l'idiom da Gruyère ch'è bunamain sparì, principalmain perquai ch'el è stà scumandà en las scolas a partir dal cumenzament dal 20avel tschientaner. El era ina da las bellas linguas dal mund francofon. Quellas han ins eliminà ina suenter l'autra. Ma il rumantsch ha per fortuna pudì sa mantegnair grazia a la forza ed a l'eleganza da la lingua e grazia a quels che la discurran. Questa lingua, era caracterisada da la cuntrada che la circumdescha, è restada vitala e viva. Ella è ina ritgezza da la Svizra.
Per consequenza èsi impurtant che nus na smettain mai da la tadlar adina puspè ... Ma era da la guardar, pertge che sche mintga lingua tuna differentamain, ha mintgina era ses agens purtrets. Quai è il merit duraivel da quels che fan la Televisiun Rumantscha: els mussan tut las fassettas da la vita rumantscha. Els fan quai cun bler talent schurnalistic, malgrà ils meds restrenschids. Ma n'è betg gist quai il secret da l'expressivitad: da dir bler cun paucs pleds, en in pèr maletgs?