«Taidlas bler – vesas cler»
2012 ha RTR introducì il nov program dal Radio Rumantsch, è s'organisà da nov cun trais partiziuns (program, tecnica, gestiun commerziala), cun dus ressorts da program (emnil e quotidian), ha lantschà la campagna «Taidlas bler – vesas cler» ed ha introducì il sistem da HD per producir films per la televisiun.
Mintga di han collavuraturas e collavuraturs infurmà e rapportà e mintga di èn emissiuns e contribuziuns vegnidas realisadas. Las paginas d’internet èn vegnidas furmadas cun video, audio e text. E nus constatain, qua en la rait sa chattan ils cuntegns senza far la differenza tge è radio e tge è televisiun.
La societad purtadra, la SRG.R, ha elegì ses persunal en ils divers gremis; Duri Bezzola terminescha ses temp d’uffizi sco president ils 31 da december 2012 e surdat il timun ad Oscar Knapp. In onn da blera lavur va vers la fin. Strusch pudain nus trair in zic flad, che l’onn nov stat avant porta, in onn che vul esser preparà e planisà (quai che l’ uman po insumma planisar e preparar). E nus constatain ina segunda giada: il mund digital pretenda da nus novas strategias e novas ponderaziuns co derasar noss cuntegns per che quels cuntanschian la consumenta ed il consument. RTR sa mova vers in nov mund - il mund da l'avegnir da noss public.