Siglir tar il cuntegn
cuntegn

2011 Accents 3

«Tgi che è stà ina giada catolic e tgi che e stà ina giada communist, quel na vegn mai liber da quai»

Ina giada Rumantschs – adina Rumantschs?

Da Heinrich Böll datti il pled a sia collega Christa Wolf: «Tgi che è stà ina giada catolic e tgi che e stà ina giada communist, quel na vegn mai liber da quai».

Pudess ins pretender il medem era dals Rumantschs? Ina giada Rumantschs – adina Rumantschs? Lur pissiun – u èsi ina passiun? – per s’alterar en dumondas da linguatg pudess laschar vegnir ad ina tala conclusiun. È quai «la spina en la spatla» per dir cun Gion Deplazes, che cutizza nus? È quai in cumplex d’inferiuradad nutrì dal fatg che nus essan paucs e che paucs sviluppeschan in reflex da defensiun per tut quai che pudess periclitar lur «da chasa»? U è quai in’ identificaziun ed in engaschi exagerà per la chara lingua da la mamma?

Ina giada Rumantschs – adina Rumantschs! Atgnamain ina bella maxima. Cuntradir ad ella fiss sco da cuntradir a quai che munta per nus patria.

Mo tant il communissem sco era il catolicissem – per restar tar Böll – n’èn betg pli quai ch’els eran ina giada. En l’Europa è il communissem tant sco cupitgà ed il catolicissem viva actualmain sia pli gronda crisa.

E la Svizra rumantscha?