La societad da musica da Zernez fa gronda festa per ses giubileum da 150 onns.
Protocols che n'eran betg ars tar il grond fieu a Zernez l'onn 1872 documenteschan che la societad da musica è vegnida fundada avant 150 onns e quintava tranter 12 e 15 musicants. In onn suenter la fundaziun saja vegni sajettà in urs sin Munt Baselgia. Ils chatschaders hajan sinaquai fatg in cortegi cun lur butin tras vischnanca e la musica instrumentala da Zernez haja accumpagnà per l'emprima giada sunond divers marschs.
Reglas severas en societad
Ils emprims instruments avevan regalà ils conjugals Nuolf da Susch a la societad. Gia da quel temp existivan statuts fitg severs, per exempel vev ins da pajar in chasti da 10 francs sch'insatgi sortiva in discordia da la societad.
Buna disciplina grazia al dirigent
La disciplina dals commembers da la societad da musica saja oz fitg buna, ha suttastritgà Roland Federspiel. El è anteriur president e musicant activ da la societad da musica da Zernez. Pli u main adina sajan tut ils 22 commembers activs preschents a las provas che han lieu il venderdi saira ed uss – en occasiun da la festa da giubileum – er anc savens la sonda durant il di. D'engraziar saja quest fatg oravant tut a lur dirigent, Roman Caduff. En il program da festa laudan tuts l'entusiassem e la passiun per la musica ch'el è bun da dar vinavant als musicants. In unicum en Engiadina è Roman Caduff er cun quai ch'el surpiglia la rolla da «Bandleader». El dirigia ils tocs e suna sez anc durant quai in instrument, per exempel la trumbetta.
Co festegiar?
Discussiuns haja dà en la societad dad oz pervi da la moda e maniera co ch'ins duai festegiar il giubileum. Ina votaziun interna haja finalmain decis: ins vul ina gronda festa da giubileum per ils 150 onns. Envidadas èn perquai er las societads vischinantas da Susch, Lavin e Cinuos-chel-Brail. Suenter ina sairada embellida cun blera musica e teater envida la societad da musica Zernez anc ad in bal cun la band «Spatzen 2000».
La festa da giubileum ha lieu sonda, ils 2 d'avrigl 2016 a partir da las 20:00 en la sala da gimnastica da Zernez.
