Vella: Scolaras e scolars da la Lumnezia fan circus

En il rom dad in'emna da project han las duas scolastas Claudia Flury e Riccarda Caduff a Vella organisà il circus Balloni.

L'exercizi da far la piramida.
Legenda da maletgs: L'exercizi da far la piramida (cun la scolasta Claudia Flury). RTR, H. GIGER

Durant quest'emna pon ils uffants da l'emprima e la segunda primara da Vella trenar da far clowns ubain d'esser in auter artist. Ils scolars èn fitg motivads, quai dian la scolasta Riccarda Caduff sco era l'animatur e profi-schonglader Florian Krähenbühl dal circus Balloni. Il circus Balloni datti dapi 25 onns e dapi 20 onns lavura Florian Krähenbühl cun scolars.

Plaschair e promover l'aspect social
La finamira principala saja d'avair plaschair e da pruvar insatge nov ubain novas abilitads. La segunda finamira saja da mussar ina bella preschentaziun, di Krähenbühl. Per la scolasta Riccarda Caduff datti era in aspect social, perquai ch'en quest project lavurian duas classas ensemen.

La finala dattan scolaras e scolars duas represchentaziuns venderdi saira ils 22-04-2016 da las 17:00 ed a las 19:30.

Laschar ir video «Circus Balloni - scolars Lumnezians fan circus»

Circus Balloni - scolars Lumnezians fan circus

2:08 min, dals 22.4.2016

Autur/a: RTR/cl