Val Lumnezia: pli attractiv per plazs da lavur

Betg mo bella, la Val Lumnezia duai era daventar attractiva per novas plazzas da lavur.
Legenda da maletgs: Betg mo bella, la Val Lumnezia duai era daventar attractiva per novas plazzas da lavur. RTR, S. Derungs

Ina da las finamiras da la Pro Val Lumnezia è da far pli attractiva la Val Lumnezia per novas plazzas da lavur. Cun questa finamira vul la Pro Val Lumnezia dar cuntrapaisa a la depopulaziun.
Sch'i dat plazzas da lavur en la Val Lumnezia, lura banduna e pli pauca glieud la Val, da quai è Silvio Capeder, il president da la Pro Val Lumnezia persvas. Perquai vul l'uniun s'engaschar per pudair crear plazzas da lavur persistentas. Quai pudessan esser plazzas da lavur da secretariat per fatschentas en la bassa ubain era plazzas da lavur nua ch?i basegnia inschigners che pon dentant far lavurs decentral, declera Silvio Capeder.

Pli savens en la Val Lumnezia
En discurs cun giasts da vacanzas haja la Pro Val Lumnezia constatà la tendenza ch'i vegn giavischà adina dapli d'avair la pussaivladad da pudair lavurar in u l'auter di durant las vacanzas. Cun metter a disposiziun infrastructura sco biros, dentant era bunas colliaziuns d'internet pudess la Pro Val Lumnezia s'imaginar che quellas persunas prolungassan ubain faschessan pli stedi vacanzas cun lur famiglias en la Val Lumnezia. Quai purtass plivalur en la val e forsa ch'in u l'auter vegniss insumma ad abitar en la Val Lumnezia, di Silvio Capeder. Tenor el pudess quai avair in effect ch'il contact cun tschertas fatschentas pudessi era procurar per ulteriuras plazzas da lavur ed uschia dess quai ina multiplicaziun.

Anc nagins projects concrets
Cun in tal svilup, manegia Silvio Capeder, ch'ins pudess era franar la depopulaziun ed a lunga vista era puspè scolar dapli la giuventetgna en la regiun. Anc n'èn dentant nagins projects concrets sin maisa ed ina finamira sin cura ch'ins vul avair creà quantas plazzas da lavur en Val Lumnezia na datti era anc betg. Sco Silvio Capeder punctuescha dentant stoppia quai sa sviluppar e crescher per ch'i saja la finala persistent e porti insatge a la val.

Autur/a: RTR/gh/dh