Trun/Rabius: «bènaltè!» il nov magazin dal Club da ballape

«bènaltè!» – in pled dal dialect ni plitost 'slang' da Trun. Quai è il num dal nov magazin dal Club da ballape Trun/Rabius.

Legenda da maletgs: RTR/Roger Alig

Ina crisa sportiva po era avair avantatgs. Il CB Trun/Rabius ha gì las ultimas duas stagiuns ina pitschna crisa. Quella ha sveglià la creativitad. Per puspè stgaffir anim e plaschair ha il club realisà in magazin.


Palpiri da qualitad – ma era cuntegn da qualitad

Il secretari dal club Patrick Rothmund è in dals iniziants dal bènaltè! Per el èsi adina stà cler ch'il magazin duai esser da buna qualitad en cuntegn e cumparsa. L'idea saja ch'ins sfegli adina puspè lien. Simpel palpiri da gasetta na saja perquai betg stà in'opziun. Uschia sa preschenta il bènaltè! uss en in'ediziun da 1500 exemplars, format A4, varga 50 paginas e stampà en colur sin palpiri da qualitad.


Ils giuvens han scrit, ils pli vegls han rimnà daners

Procurà per il cuntegn ha ina redacziun da nov giuvens commembers. Quels pli vegls han persuenter tschertgà e chattà inserents per cuvrir ils custs ch'èn datiers da 6000 francs.

Ils temas èn vasts e cumpiglian per exempel artitgels divertents cun tops e flops da giugaders actuals e da pli baud, purtrets da legendas e gidanters ed istorgias davart la fascinaziun dal ballape.


Perfin ils rivals eterns han lur plazza en il bènaltè!

Perfin ils rivals eterns da l'Uniun sportiva Danis-Tavanasa han survegnì ina plattafurma. Il tenor: I na dat strusch insatge mender che da perder il derby. Il sulet che fiss anc mender fiss sch'i na dess in di betg pli il derby Trun-Tavanasa.

Autur/a: RTR/ra