Suenter 100 onns duai la chasa da Mili Weber vegnir sanada

Dapi l'onn 1917 stà la chasa da Mili Weber a la riva dal Lai da San Murezzan. Dapi sia mort è ella in museum, purtà d'ina fundaziun. Questa fin d'emna vegn fatg festa e preschentà ils plans per sanar la chasa e per inscenar meglier sia art.

La chasa da Mili Weber - ina sort da chalet da lain e crap
Legenda da maletgs: La chasa da Mili Weber a la riva dal lai da San Murezzan festagia questa fin d'emna ses giubileum da 100 onns. RTR, Riccarda Müller

Dal 1917 fin tar sia mort il 1978 ha l'artista, scriptura e cumponista Mili Weber vivì en sia chasa. Vers la fin da sia vita ha ella transmidà la chasa en in museum cun il giavisch, che la chasa restia era suenter sia mort averta per tuts.

En la chasa èsi sco en in auter mund. Dapertut pendan aquarels vi da las paraids. En intginas stanzas èn era ils palantschieus sura colurads. I dà ina stanza da musica cun ina orgla ed in pitschen atelier.

Suenter il giubileum da 100 onns duai la chasa vegnir sanada, senza midar ses spiert, sco la manadra dal museum Cordula Seger ha declerà ad RTR. Tranter auter duai l'illuminaziun vegnir professiunalisada, las lingias d'aua e d'electricitad duain vegnir sanadas ed i dovra in nov stgaudament. Custar duai tut quai plirs 100'000 francs. Quels custs duain vegnir purtads da donaziuns e sponsurs. Igl è previs da cumenzar cun las lavurs il settember 2018.

Il giubileum ha lieu sonda, ils 9 da settember en la chasa Mili Weber a San Murezzan. Là vegnan preschentads ils plans per la sanaziun, i dà ina premaudiziun d'ina cumposiziun da Mili Weber ed in film sur dad ella, nua che perditgas dal temp raquintan da lur inscunters cun l'artista.

Autur/a: Riccarda Müller