Signuradi: Chattar il termin optimal per la vendemia

En il Signuradi na pon ils viticulturs betg cumenzar cun la vendemia simplamain cura els vulan. Igl è da sa radunar e tschertgar communablamain in termin.

Vista sin ina vigna.
Legenda da maletgs: En il Signuradi decidan ils viticulturs da cuminanza, cura che la vendemia ha da cumenzar en lur vitgs. RTR, H. Schär

Quai è gia dapi onns uschia. Envidar a la radunanza envida la suprastanza communala u il cussegl communal. Decisiv per ina buna e speditiva radunanza dals viticulturs saja la preparaziun, quai di Urs Hermann, president dals viticulturs da Maiavilla.

I saja da guardar la prognosa da l'aura a curta e media vista ed era fitg decisiv saja il grad da zutger da las ivas, il grad d'Oechsle. Il meglier saja ina concentraziun da zutger tranter 95 e 97 grads Oechsle. Els mesirian quai mintg'onn en ils medems lieus. Ils davos dus onns haja lura era la «Kirschessigfliege» (drosofila da tscharescher) influenzà la decisiun. Tut tenor ha l'insect nuschaivel sfurzà ils viticulturs da spustar la vendemia per plirs dis. Quest onn na saja quai betg uschia, di Hermann. Sco i para n'haja la drosofila betg chaschunà tant donn sco temì.

La bun'aura da stad empermetta quest onn ina buna qualitad da vin. Ils viticulturs da Fläsch han decidì da dar liber la vendemia ils 21-09. Els han pia gia cumenzà. Maiavilla ha decidì ier saira da cumenzar ils 22-09 e Jenins n'ha anc betg decidì.

Autur/a: RTR/hs