Sedrun: Tschertgar musicants en la Bassa

La Societad da musica Sedrun tschertga rinforzament per lur musica en la Bassa.

La Societad da musica Sedrun a chaschun da la festa da musica chantunala a Cuira 2013.
Legenda da maletgs: La Societad da musica Sedrun a chaschun da la festa da musica chantunala a Cuira 2013. MAD

Possessurs d'abitaziuns da vacanzas da Tujetsch ch'abiteschan en la Bassa han dacurt survegnì posta. Il speditur, la Societad da musica Sedrun, tschertga sin questa via musicants che rinforzan la musica per ils concerts.

I na saja betg uschia che la musica na pudess betg sa preschentar, declera il president Vigeli Jacomet a Radiotelevisiun Svizra Rumantscha. Cun ils 24 musicants ed il dirigent possia la musica senz'auter dar concerts u embellir las festas en vischnanca. Tar ils instruments gronds e la percussiun saja dentant scart cun musicants.

L'idea per lantschar quest'acziun è tenor il president Vigeli Jacomet naschida, perquai ch'igl ha dà in contact tranter la musica ed in possessur dad in'abitaziun da vacanzas che abita en la Bassa. Quel suna in instrument da sturs ed è stà pront da sustegnair la musica quest onn tar il concert. Uschia haja la suprastanza gì l'idea dad insumma tschertgar en la Bassa per rinforzament.

Las reacziuns sin quest'acziun sajan per il pli positivas, ha ditg Vigeli Jacomet. Quai tant tar ils retschaviders da las brevs, ils commembers da la societad da musica ma era tar ils auters ch'han udì da quest'acziun.
Redacziun: Gion Hosang

Autur/a: RTR/oc