«Sche James Bond dovra ina nova culissa: nus avain ina»

L'uniun Viva Disentis duai manar ensemen giasts ed indigens per nizzegiar contacts e savida ed uschia muventar insatge.

Purtret dal team da Viva Disentis: Stefan Schwenke, Judith Huonder, Hans Möckli, Corinne Staub, Michel Pola (da sanester).
Legenda da maletgs: Il team da Viva Disentis: Stefan Schwenke, Judith Huonder, Hans Möckli, Corinne Staub, Michel Pola (da sanester). MAD

En las vischnancas nua che las taxas da turissem en vegnidas midadas sin pauschalas ed il possessurs d'abitaziuns da vacanzas ston pajar dapli, èn savens sa furmadas gruppas d'interess che represchentan quels interess. Uschia era a Mustér. Mo a Mustér è era naschì ord quest ravugl in'autra uniun. L'uniun Viva Disentis, che na vul betg far encunter las taxas, mabain che vul promover quai ch'è bun en la vischnanca. Sco l'inizianta e presidenta da l'uniun Corinne Staub ha ditg a Radiotelevisiun Svizra Rumantscha, duai Viva Disentis stabilir contacts tranter indigens e giasts. Bleras interessantas chaussas ch'i dat u che capitan en vischnanca na vegnan ins sco giast da vacanzas betg a savair, sch'ins n'haja betg buns contacts cun ils indigens.


Sustegnair quai ch'i dat gia
L'uniun è averta per indigens sco era per giasts da vacanzas. Impurtant è per Corinne Staub che las persunas indigenas n'han betg il sentiment che las persunas da la bassa vegnian ussa a Mustér per mussar ch'ellas sajan meglras e sappian co tut funcziunescha meglier. «A nus vai persuenter ch'ins cuntanscha dapli da cuminanza che mintgin singul.» Viva Disentis vegn era sezza ad organisar ina ni l'autra occurrenza, ma oravant tut vul l'uniun sustegnair quai ch'i dat gia. Uschia è previs da metter ensemen ina glista da gidanters che pon gidar tar occurrenzas.

Contacts èn impurtants
Il potenzial da commembers e fitg grond tenor Corinne Staub. Mustér haja durant la stagiun auta fin 8000 persunas en il vitg. Quai saja tut potenzials commembers. Cun 2000 commembers fissan els dentant era cuntent. Ins stoppia pensar magari visiuns in pau astronomicas per insumma cuntanscher insatge, manegia Corinne Staub cun in rir. La finala giaja quai betg per la quantitad da commembers, mabain per la qualitad. «Nus vulain glieud cun ideas, che fan part e che vulan muventar insatge a Mustér.» Ideas co dumagnar vinavant Mustér ha Corinne Staub en mintga cas. «Sch'i dovra per il James Bond ina bella culissa, lura avain nus qua bellezza culms. Sch'insatgi avess pia davair relaziuns en quests circuls, lura essan nus gugent pronts da manischar quai.» La rait da contacts che sa dattan tranter las fitg differentas persunas indigenas e da la bassa èn fitg impurtants e duessan esser ina schanza per la regiun. Uschia pudessan tut tenor vegnir tratgas novas occurrenzas a Mustér ubain era ils indigens profitar per exempel per l'atgna fatschenta da savida da persunas da la bassa.

Tut las infurmaziuns davart l'uniun èn da chattar sin la pagina d'internet. Ils chanals da Facebook e Twitter vegnan medemamain duvrads per far enconuschenta l'uniun sco era las purschidas ed activitads en la regiun.

Autur/a: RTR/cl