Savognin: Selvicultur schubregia guaud da lareschs dals pigns

A Savognin èn las davosas trais emnas vegnidas fatgas lavurs vi dal guaud da lareschs. Ils pigns ch'èn creschids sut ils lareschs èn vegnids pinads. Uschia datti ina biodiversitad pli vasta ed ils purs pon duvrar la pastgira per laschar pascular ils animals.

Durant trais emnas ha la gruppa forestala Surses pinà planta dasperas la Veia d'Alp a Savognin.
Legenda da maletgs: Durant trais emnas ha la gruppa forestala Surses pinà planta dasperas la Veia d'Alp a Savognin. RTR, F.Belotti

Sco quai che Pascal Murbach, il manader dal servetsch forestal Surses di, profita la biodiversitad da las lavurs. Uschia possia il guaud da lareschs en il futur puspè vegnir duvrà per laschar pascular ils animals. In guaud da lareschs saja interessant da nizzegiar sco pastgira perquai che las curunas dals lareschs laschian tras dapli glisch ch'autras plantas. Uschia possia giun terren sa sviluppar chagliom ed ina vegetaziun bassa multifara. Cun runcar las autras plantas, sco per exempel ils pigns che stgirentan il terren sut ils lareschs, possia la vegetaziun giun terren vegnir mantegnida.

Autur/a: RTR/fb/dh