Atgnamain ha Andreas Luck vulì vegnir mecanist da töffs, quai fiss stà sia clamada da siemi. Ses bab n'ha dentant betg vulì quai ed uschia ha Andreas Luck emprendì construider da buis. Suenter l'emprendissadi ha el lavurà 3 onns sin sia professiun ed è là adina vegnì en contact cun buis ch'eran gravadas. Quai ha fascinà el. Gia sco buob haja el dissegnà bain ed el aveva era in dun per entagliar lain. Uschia haja el cumenzà a s'interessar per la gravura.
Scolaziun da gravader a Ferlach
Suenter avair legì intgins cudeschs e revistas davart la gravura ha el fatg la scolaziun da gravader. Era suenter la scolaziun ha el pudì lavurar en l'Austria anc in onn e gia gì lavur da la Svizra. L'onn 1985, l'atun, è Andreas Luck returnà en sia patria ed ha avert ses agen atelier da gravura. Il cumenzament eran 80-90% da sia lavur da far gravuras, il rest eran reparaturas e service da buis. Quai è sa midà. Ozendi fan las gravuras anc ora radund la mesadad da la lavur.
Las buis gravadas èn unicats
Mintga buis da chatscha che Andreas Luck gravescha èn unicats. El na fetschia mai la medema gravura duas giadas. «Ina sumeglianta bain, dentant mai la medema», di Luck. Quai na vulessia el betg ed era envers il client na fiss quai betg en urden. Lez veglia in unicat e paja era persuenter. Andreas Luck fa las gravuras durant il temp d'enviern e baud la primavaira. Il rest da l'onn ha el da far reparaturas e service, va a sajettar cun clients.
El sez è dentant era chatschader, el giaja cun gust sin chatscha bassa, di el.