A Mustér è la corporaziun d'aua Spina da vin responsabla per il provediment d'aua en tut las zonas da bajegiar. Uschia era per Caischavedra. Fin ussa avevan las pendicularas in agen provediment d'aua cun in reservuar e retiravan era anc aua da la Spina da vin.
Aua da baiver e per ennevar
En connex cun ils plans dennavar han las pendicularas dentant il giavisch da pudair retrair dapli aua. Perquai haja la Spina da vin decidì da surpigliar il provediment d'aua da Caischavedra, declera il president Aluis Flepp. Uschia vegnan construidas lingias d'aua pli grondas ed in nov reservuar en il territori Lag da Tgauns. Cun quest reservuar nov saja quai pussaivel da garantir il provediment d'aua da baiver e per far naiv.
In ulteriur punct impurtant saja dentant era chins possia garantir la reserva d'aua per cas da fieu. Quai saja era stà tenor Aluis Flepp in punct central per la realisaziun. Ch'il reservuar n'è betg en il medem lieu sco quel che las Pendicularas Mustér avevan ha in cler motiv. Davent da Lag da Tgauns pon ins manar laua che na vegn betg duvrada a Caischavedra en il provediment d'aua da la vischnanca.
En funcziun avant l'enviern
I vegn quintà cun custs da var 900000 francs. 700000 francs paja la Spina da vin. Il rest pajan per part il chantun e per part las Pendicularas Mustér. Lezzas ston surpigliar ils custs che sa dattan perquai ch'ellas vulan duvrar aua per far naiv. Las lavurs duain anc vegnir terminadas avant l'enviern.