Mustér : Il nov café vul visar vi sin l'architectura

La centrala da latg a Mustér era enconuschenta, perquai che la glieud cumprava products da latg e perquai che la scolina era en il medem bajetg. Uss datti in local nov en quest bajetg.

Il nov café «La centrala» a Mustér
Legenda da maletgs: Il nov café «La centrala» a Mustér RTR, Hubert Giger

Num predestinà

Dapi ils 22 da fanadur 2017 è il nov café avert. El sa chatta en il center dal vitg. Ils possessurs èn Sonja e Stefan Coray-Capaul. Il num Café «La centrala» saja predestinà en in lieu central, nua che Nicolette Manetsch (che maina il café) beneventia ils giasts e nua ch'els possian esser da cuminanza, di Sonja Coray.


Nizzegiar sinergias cun l'architectura

Dapi 2005 hajan els acquistà l'anteriura centrala da latg sco chasa da fatschenta. Cura che l'abitaziun sisura saja vegnida libra hajan els installà là ils biros. E suten saja restà mo l'entrada, e perquai hajan els vulì far insatge ord quest local. En discussiun cun Nicolette Manetsch saja naschida l'idea da far in café. Impurtant saja stà da crear ina plazza cumplaina ed era da nizzegiar sinergias cun la fatschenta d'architectura; vul dir: il café saja ina recepziun prolungada da quel. Sco Sonja Coray di duai il café era esser ina carta da visita per lur fatschenta. I saja in local per mussar co els bajegian, co els veglian che la glieud sa sentia bain en in local e co ins possia cumbinar stils e qualitad da bajegiar.


Dialog cun il giast

La strategia da bajegiar saja stada da procurar che mintga element sco per ex. ischs, il buffet ubain il palantschieu haja in tschert dialog cun il giast, declera l'architect Stefan Coray. Il giast duai far patratgs sur dal stil e sa dumandar, pertge ch'els hajan fatg quai uschia e betg auter. La finala fetschia quai alura era interessant il local. I saja bain in ristg d'avrir in manaschi gastronomia; ma il star da cumpagnia saja ina buna investiziun en lavegnir.


Giast duai sa sentir bain

Per Nicolette Manetsch èsi impurtant ch'il giast sa sentia bain e ch'el possia giudair products frestgs e regiunals. Ella ha gia lavurà en la gastronomia; e sco ella di haja ella vulì surpigliar ina giada in tal manaschi. Ella veglia dar paisa ad ina buna qualitad en ina buna atmosfera.

Autur/a: Hubert Giger