Siglir tar il cuntegn

Header

audio
A Segnas vegnan las drenaschas sanadas.
RTR
laschar ir. Durada: 3 minutas 45 Secundas.
cuntegn

Mustér: 30 milliuns francs per la meglieraziun funsila

Il mars 2012 avevan votantas e votants da Mustér decidì d'instradar la meglieraziun funsila per la vischnanca da Mustér (cun resguardar la situaziun da Segnas e Pardomat). Uss ston els danovamain prender posiziun e decider d'in credit da 30 milliuns francs per la meglieraziun.

Ils purs da Mustér cultiveschan passa 1800 parcellas. Ina statistica mussa ch'i deva 2015 anc 33 manaschis (2010 : 40). Cun la meglieraziun duain las parcellas vegnir reducidas per «meglierar ed optimar cundiziuns per il puresser», èsi scrit en il messadi per la votaziun communala dals 24 davrigl 2016.

Per las vias da megliuraziun vegn impundì 24 milliuns francs. La gronda part da la vias vegn renovada; ina terza èn vias novas. La sanaziun da las drenaschas da Segnas custa 1,5 milliuns francs.

85 milliuns dal maun public
En tut custa la meglieraziun funsila da Mustér 30 milliuns francs. 85% surprendan confederaziun e chantun. Per la vischnanca resta 4'670'000 francs respectiv 100'000-150'000 francs ad onn. En vista al fatg ch'il project genereschia onn per onn investiziuns da 900'000 – 1.1 milliun francs saja la cumpart annuala da la vischnanca «supportabla e responsabla». La cumpart dals proprietaris da terren fa 2'340'000 francs.

Avantatgs per tuts
La finamira da la meglieraziun funsila da Mustér saja da guardar che la cuntrada salvia sia fatscha; da mantegnair, sanar ed engrondir ils manaschis purils; cultivar il terren main accessibel e garantir il transport dal pavel e da realisar ina rait da vias che nizzegia a l'agricultura, al forestalesser, al turissem ed era a la populaziun, di la geraua d'agricultura Cecilia Maissen.

L'uniun purila Mustér sustegna il project, sco il president Armin Manetsch di. El e ses convischins da Mumpé Medel hajan gia fatg bunas experientschas cun la meglieraziun da 1993. Cun bunas e grondas parcellas possian els cultivar a moda raziunala il terren ed els hajan uss vias, sin las qualas els possian charrar fitg bain. Senza la meglieraziun na faschess el tgunsch betg pli il pur a Mumpé Medel.

35 protestas
Sa chapescha ch'i dat era resalvas envers in project da talas dimensiuns. Encunter quel saja vegnì inoltrà 35 protestas al departament d'economia publica e fatgs socials, èsi scrit en il messadi.

Dapli da «Total local»

Scrollar a sanestra Scrollar a dretga