Musica Suraua: Exercizi public è in experiment

Uffants e creschids han visità quest exercizi tut spezial.

Empruvar da sunar, quai fa tschaffen e dat novs musicists.
Legenda da maletgs: Empruvar da sunar, quai fa tschaffen e dat novs musicists. RTR Linus Livers

Avant l'exercizi pon tuts empruvar ils instruments: Dar sin la percussiun, suflar en ina trumbetta ni dar sin il xilofon. Ils musicist da la musica da Suraua dattan tips e gidan dapertut. Varga 20 persunas han accumpagnà l'exercizi public e fatg diever da questa purschida in pau speziala. Cuntanscher la populaziun cun quest exercizi public – quai è l'idea fundamentala da la musica da Suraua.

La musica da Suraua dumbra ussa 29 commembras e commembers, il pli bler ch'ella dumbrava ina giada eran 37 musicistas e musicists. Quest onn po la musica da Suraua festivar 40 onns e quai vegnan els a far il matg cun in concert communabel cun il chor da Suraua, che ha quest onn 44 onns.

Redacziun: Linus Livers