L'ultima opziun avant che durmir sin via

A Cuira datti in alloschi d'urgenza per persunas che n'han nagin da chasa, ch'han problems psichics, famigliars u cun drogas. Qua datti spaisas chaudas, agid administrativ sco era in letg per durmir – l'ultima schanza avant che stuair durmir sin via.

Legenda da maletgs: RTR, Ivo Orlik

Persunas senza tetg han la pussaivladad da chattar alloschi d'urgenza a Cuira. La chasa da quatter auzadas sa chatta en la vischinanza dal Welschdörfli e vegn numnada «Notschlafstelle».
Per tschintg francs datti in gentar cun salata e bavronda, per 10 francs datti in letg cun tschaina e solver.

Per regla cuschina la Gassenküche per 8 persunas, sur notg stattan circa 3 fin 4 persunas. Ils collavuraturs da la chasa dattan tut tenor basegn era cussegls administrativs u gidan da chattar ina abitaziun ed ina lavur.

Autur/a: Ivo Orlik