L'electricitad da Medel vegn uss da Tujetsch

Consumentas e consuments da la vischnanca da Medel retiran uss l'electricitad da l'interpresa tuatschina 'energia alpina'. Ina lingia nova è vegnida installada da Sedrun fin la staziun da transfurmaziun a Fadretsch/Curaglia.

In dals dus cabels en la caverna da la ORA.
Legenda da maletgs: In dals dus cabels en la caverna da la ORA. RTR, Hubert Giger

Segirtad cun in segund cabel

Stemprads, bovas e naiv han adina puspè chaschunà difficultads a lOvra electrica Medel OEM. Surtut la lingia tranter Fadretsch e Mustér è stada interrutta. Perquai ha la OEM chattà ina schliaziun. En la galaria, construida avant passa 50 onns, ha lenergia alpina montà dus cabels che furneschan la forza electrica. Dus, perquai che sch'in haja in defect, hajan ins anc in segund, declera il manader da fatschenta da lenergia alpina Ciril Deplazes.

Cabels giaschan en l'aua

Ils cabels hajan in mantè spezial, perquai chels èn en laua. I sa tracta da laua dals lais da fermada da Sontga Maria, Curnera e Nalps che cula tras la gallaria. Per chils lavurers possian installar ils cabels ha lAxpo Hydro Surselva stuì tschentar giu laua, ed en quests muments perda linterpresa energia.

Far la lavur en tschintg dis

Per far questa lavur hajan els gì temp tschintg dis. Els hajan stuì planisar tut ordavant cun plirs facturs nunenconuschents sco: va questa maschina, vegn ins da sa manar en quest lieu e vegn ins vidlonder cun il material. En tscherts lieus hajan els stuì fermar ils cabels pli ad aut che previs.

Dus milliuns francs

La lingia delectricitad var sur ina distanza da set kilometers da Sedrun fin Fadretsch damanaivel da Curaglia. Ella ha custà dus milliuns francs. Questa summa ha lenergia alpina surprendì. LOvra electrica Medel OEM ha stuì pajar ils custs da cumplettar la staziun a Fadretsch (investiziuns nettas da 961200 francs).
Lenergia alpina po furnir electricitad per ca. 1'300 chasadas e bajetgs sco quels sin il Scopi ubain en Val Cristallina (4'500 uras kilowatt per chasada).

Lingia nova pli segira

Lavantatg da questa schliaziun è che la lingia nova è pli segira che la veglia, di il president da la OEM Hanspeter Bundi. La lingia veglia era en il liber da Fadretsch sur Mompé Medel fin Mustér. Per consumentas e consuments na sa midia nagut, lenergia na vegnia pli chara.

Autur/a: Hubert Giger