La vernissascha sa numna «Après Olympics» e sa chatta en in bikeshop a Scuol. Elena Könz ensemen cun «Rips1», in artist da Lucerna, preschentan lur ovras.
Ils purtrets d'Elena Könz èn ina variaziun da fotografia cumbinà cun maletgs da fantasia sco per exempel in dragun. Cun quel dragun vul ella integrar in nov mund sin quel existent.
«Il dragun è in zichel sco mes jau, ins na po betg dir quant fictiv u quant real che quel è – in animal da fantasia», uschia Elena Könz.
Betg deponì il snowboard en in chantun
Per Elena Könz, la champiunessa mundiala en la sparta «Big Air» l'onn 2015, resta il snowboard enavant en il center da la vita. Ella vul sa concentrar sin projects pli creativs, realisar videos e films, far viadis e preschentar lieus anc betg enconuschents per ir cun snowboard.
Era suenter la carriera da snowboard restan anc differents sponsur fidaivels ad ella. Ultra da quai vul ella era s'engaschar dapli per projects en connex cun l'ambient.
