Siglir tar il cuntegn

Header

audio
Il Chor Uvriu Danis-Tavanasa durant in'emprova.
RTR, G. Hosang
laschar ir. Durada: 3 minutas 52 Secundas.
cuntegn

Danis-Tavanasa: Cantata d'Ursin per giubileum

Il Chor Uvriu Danis-Tavanasa po festivar quest onn ses 10avel giubileum. Quai vegn fatg cun ina primaudiziun.

Per il giubileum ha il dirigent Daniel Pally surdà ad Albert Spescha da cumponer ina cantata ord l'istorgia d'Ursin. Il cumponist ha elegì ord l'istorgia 10 da las 20 scenas e cumponì tar il text translatà en sursilvan da Gion Cadieli la musica.

El haja sa laschà inspirar dals purtrets d'Alois Carigiet, ha ditg Albert Spescha. I sa tracta da cumposiziuns per chor maschadà e clavazin. Sco Daniel Pally di, èn las chanzuns adattadas al chor uschia ch'i giaja bain da chantar ellas. Il chor chantia gugent las chanzuns popularas, manegia il dirigent vinavant.

Istorgia adattada per ina cantata
L'idea da laschar cumponer ina cantata ord l'istorgia d'Ursin per il concert da giubileum, ha Daniel Pally gì sez. El haja tschertgà ditg fin ch'el haja chattà ina istorgia rumantscha che saja adattada persuenter. Savens erian ils texts memia lungs.

Las scenas da l'istorgia che na vegnan betg chantadas, vegnan raquintadas da Giorgio Arpagaus. La chanzun finala vegn chantada ensemen cun ils uffants dal stgalim aut. Avant la cantata chantan ils uffants anc intginas chanzuns da tut different gener.

Dapli da «Total local»

Scrollar a sanestra Scrollar a dretga