Cuira: Nov parc da skate

Skaters da Cuira e conturn en il «Rathole» – ina uschenumnada Bowl. Questa sta en in edifizi vegl or da betun e lenn.
Legenda da maletgs: Skaters da Cuira e conturn en il «Rathole» – sin ina uschenumnada Bowl, construida en atgna reschia. RTR, D. Hardegger

Ils iniziants dal Rollbrett Club Chur han preschentà als cussegliers da citad lur concept davart in parc da skate a Cuira. Quai cun success. Ussa vai per examinar las pussibilitads per la realisaziun.

Il team da bun diesch persunas enturn il president dal Rollbrett Club Chur, Mario Vonau, ha en ils ultims dus onns lavurà vi dad ina idea ed in concept per in nov parc per assas cun rodas. Cun la preschentaziun dal project als cussegliers da citad han els ussa fatg in pass vinavant.


In parc uschè grond sco ina enfin duas plazzas da ballape


Ils iniziants han gia ina clera idea dal parc. Uschia duai quel esser or da betun ed esser adattà per grond e pitschen. In lieu ideal fiss l'Obere Au. Là existan gia indrizs da sport cun gardarobas e tualettas. Ulteriur datti là era parcadis ed ina fermada dal bus. La difficultad è ussa dentant, tenor il cusseglier da citad Tom Leibundgut, da chattar il lieu adattà sin l'areal. Per il mument existan ideas per ina nova halla d'exposiziun tar l'Obere Au sco era per il svilup dals indrizs da sport existents. Per quai saja ussa impurtant da planisar bain è betg surbajegiar il terren ch'ins duvrass tut en ina per in auter indriz. Ils iniziants vulan realisar il parc da skate enfin la stad 2017. Tenor Tom Leibundgut è quella planisaziun da temp realistica.

Laschar ir video «Il cumbat per il skatepark»

Il cumbat per il skatepark

2:52 min, Battaporta dals 20.3.2015

Autur/a: RTR/dh