Cuira: Futterknecht serra

L'onn 1951 ha in falegnam en il Welschdörfli a Cuira rivì in ufficina. En quella restaurava el mobiglias. E or dal pitschen affar è creschì ina chasa da mobiglia. Ma uss, suenter 66 onns, sto il figl dal fundatur, Hanspeter Futterknecht, serrar l'affar.

Suenter 66 onns serra la butia cun mobiglias plitost exquisita.
Legenda da maletgs: Suenter 66 onns serra la butia cun mobiglias plitost exquisita. RTR / Flurin Clalüna

Il manader da la fatschenta è trist, ch'el sto uss serrar ses affar. Dapi l'onn 1987, dimena bunamain 30 onns, maina el l'affar.

Motivs economics sforzan da serrar l'affar. Blera glieud cumpra lur mobiglia online u va en ina da las grondas butias sco per exempel IKEA. Latiers vegn il ferm franc. Las entradas van enavos, ma ils custs sco pajas, tschains e per la mobiglia restan medem aut. E bain ch'el ha empruvà d'adattar ils custs, il effect era memia pitschen.

Futur stà en las stailas
El na sà betg sco ch'i va enavant suenter la serrada il mars 2017. Quai sa lura sch'igl è uschenavant, di il manader da la fatschenta cun in surrier trist.

Autur/a: RTR / Corina Luck