Cuira: Curs da tiba en il parc da la citad

Las tibas na sa chatta betg mo en las muntognas. Era en il parc da la citad a Cuira pon ins tadlar suns da quest instrument. Werner Erb, in lavurer social pensiunà, maina mintga mesemna in curs da sunar tiba. Ch'el ha tschernì precis quest lieu per quest curs stat en connex cun sia professiun.

mintgin po far il curs da Werner Erb.
Legenda da maletgs: mintgin po far il curs da Werner Erb. RTR / Flurin Clalüna

Dapi sia pensiun l'avust 2016 maina il sunatiba passiunà il curs en il parc da la citad a Cuira. Là sa chattan era blers da ses anteriurs clients. Persunas ch'el enconuscha da l'alloschi d'urgenza da Cuira. Là aveva Werner Erb lavurà sur 15 onns. E cunquai ch'el ha spustà il curs dals locals da prova en l'aria frestga, po el vinavant discurrer cun e gidar a las persunas senza tetg.

Buns discurs ed ina buna maschaida

In'autra mira dal curs è, ch'ins discuta in cun l'auter. E tenor Werner Erb grategia quai fitg bain. Ils participants dal curs, ils passants che passan ina u l'autra giada speravia e las persunas senza tetg stattan ensemen enturn ina maisa e discutan cun in café en maun. Dispita n'haja quai anc mai dà tranter els.

Tenor Werner Erb para propi dad esser uschia: La musica collia.

Autur/a: Flurin Clalüna