Siglir tar il cuntegn
Inhalt

Suvlaki, Gyros e Capretta La cuschina da Chile cun Maeggie Della Valle Valenzuela

Tradiziun, art e cultura – la cuschina da Chile cun Maeggie Della Valle Valenzuela da Trun.

Maeggie Della Valle Valenzuela.
Legenda: Maeggie Della Valle Valenzuela. RTR, Gaby Degonda

Margarita Della Valle Valenzuela lavurava sco secretaria en ina da las pli grondas universitads en sia cità nativa Santiago de Chile.

A chaschun da sias vacanzas a Dalcahue sin l’insla Chiloé en l’Ocean Pacific l’onn 1989, ha Maeggie emprendì d’enconuscher Renato Della Valle da Trun ch'era da viadi en ils pajais da l’America dal sid cun in camarat Sursilvan. La simpatia vicendaivla ha avischinà Renato e Maeggie ed els èn daventads amis e pli tard in pèr.

L’onn 1991 è Maeggie arrivada per l’emprima giada en Svizra. La natira, la cuntrada ed er las persunas han plaschì fitg bain ad ella. Uschia ha il pèr multicultural decidì da maridar l’onn 1994 e da sa chasar a Trun en Surselva. Maeggie ha emprendì rumantsch e quels che vulan emprender spagnol chattan tar Maeggie ina buna mussadra. Maeggie ha laschà enavos sia mamma, ses frar e sia sora a Santiago de Chile. Mintga dus onns emprova ella da visitar sia famiglia ed era ils uffants creschids, Marlis (21) e Fabrizio (18) èn gia stads pliras giadas en Chile.

Maeggie Della Valle è bain integrada a Trun qua ha ella chattà ina secunda patria. Ella lavura parzialmain en Chasa S. Martin. Lavurar cun persunas attempadas dat gronda satisfacziun e plaschair ad ella. Durant il mais da fanadur ans preschenta Maeggie pliras spaisas e tradiziuns da sia patria il Chile.