La cifra – 83.5 kilos

Stuschar il crap dad Unspunnen, quai è ina da las tradiziuns ed er attracziuns da la festa da Unspunnen che va liber quest'emna ad Interlaken. E quai crap paisa betg main che 83.5 kilos.

Il crap dad Unspunnen in vair coloss.
Legenda da maletgs: Il crap dad Unspunnen in vair coloss. Keystone

La festa da Unspunnen ha ina tradiziun da passa 200 onns. Cun ella era la concurrenza da stuschar il crap da Unspunnen. Gia all'entschatta dals onns 1800 empruavan ils umens da stuschar il crap da Unsupunnen uschè lunsch sco pussaivel. Il record da 4.11 meters è vegnì realisà l'onn 2004 da Markus Maire dal chantun Friburg.

Enconuschent er pervi d'enguladitschs

Il crap da Unspunnen n'è betg mo enconuschent pervi da l'aspect sportiv. El è er vegnì engulà duas giadas. L'emprima giada han commembers da la gruppaziun separatista dals Béliers engulà il crap ord il museum da la regiun dal Jungfrau. Ils Béliers èn ina gruppaziun che cumbatta per in Giura liber. L'onn 2001 han els lura returnà il crap.

La segunda giada han nunenconuschents engulà il crap ord in hotel ad Interlaken l'onn 2005. Laschà enavos han ils delinquents in crap da sulada cun si la vopna dal Giura.

Autur/a: Selina Chistell