La cifra – 32 grads

Dapi dis mussa il termometer temperaturas enturn 30 grads. Oz ha Meteo Svizra annunzià el Grischun temperaturas maximalas da 32 grads. Quels 32 grads èn dentant anc lunsch davent dal record.

Temperaturas da varga 30 grads na muntan betg automaticamain dis da chalira.
Legenda da maletgs: Temperaturas da varga 30 grads na muntan betg automaticamain dis da chalira. Keystone

Uschè spert ch'il termometer mussa temperaturas da varga 30 grads, pensan blers ch'i sa tractia da temperaturas da record. Il record svizzer è dentant in toc pli aut. La stad da chaliras da l'onn 2003 è vegnì mesirà a Grono ina temperatura da 41,5 grads. Quella temperatura vala sco temperatura da record en Svizra.

Dis da chalira dependan er da l'umiditad

Dis da chalira, uschenumnads «Hitzetage», n'èn betg mo dependents da la temperatura mabain er da l'umiditad da l'aria, quai tenor l'index uffizial da chalira da la Svizra. Uschia na san ins betg dir, che dis da per exempel 30 grads e dapli valan sco dis da chalira. Pli umid ch'igl è e pli spert ch'in di vala sco di da chalira. Tar in'umiditad dad 80% dovra quai 29 grads per in di da chalira. Tar in'umiditad da mo 30 pertschient sto il termometer mussar 35 grads ni dapli, per ch'in di da chalira è cuntanschì.

Autur/a: Selina Chistell