La cifra – 10 moziuns tar la chatscha en ils ultims 15 onns

En ils ultims 15 onns ha il Cussegl grond dal chantun Grischun discurrì 10 giadas sur da la chatscha. En tut èn numnadamain 10 interpellaziuns, dumondas ubain incumbensas vegnidas inoltradas a la regenza.

Il Cussegl grond dal Grischun debatta adina puspè sur da quai e tschai pertutgant la chatscha
Legenda da maletgs: Il Cussegl grond dal Grischun debatta adina puspè sur da quai e tschai pertutgant la chatscha RTR, Sabrina Bundi

Dentant èn quai 10 moziuns da total 1'102. Quai munta, che be mintga tschientavla moziun ha gì la chatscha sco tema. 10 moziuns en 15 onns munta dentant er, ch'il Cussegl grond ha discussiunà mintga in onn e mez da la chatscha.

Per part tractan las moziuns midadas fitg detagliadas da la lescha, per exempel pretendeva ina incumbensa dal 2009 da stritgar or da la lescha la disposiziun che restrenscha la grondezia dal caliber sin 10.2 mm. Autras pertutgavan betg be ils chatschaders, mabain er quels che van a tschertgar bulieus. Il 2004 ha quai dà ina dumonda, schebain la regenza na saja betg er da l'opiniun da spustar il scumond dad ir per bulieus, uschè n'hajan ils chatschaders betg trasor ils guauds plain glieud che van per bulieus. La regenza na veseva lura nagin basegn da midar quai, il scumond dad ir per bulieus saja fixà tenor la protecziun dals bulieus e betg tenor la protecziun da quels che tschertgan bulieus.

In'ulteriura interpellaziun dal 2002 tracta la dumonda, schebain telefonins duain esser lubids durant chatscha. Oz dat quai schizunt apps per chatschaders.

Autur/a: RTR/sb