Il Digitip – Innovaziuns per survegliar l’isch-chasa

Discurrer cun il postin ch'è avant chasa ed avrir l'isch-chasa per ch'el possia metter en in pachet – e quai era sch'ins è gist en vacanzas. Cun il dretg equipament tecnic è quai pussaivel.

In telfonin, ina camera da surviglianza e in glob terrester.
Legenda da maletgs: Innovaziuns per survegliar l'isch-chasa Colourbox

Avant curt èn vegnids preschentads a la IFA, Internationale Funkausstellung a Berlin, sistems per survegliar igl isch-chasa e schizunt avrir quel, cura ch'ins è lunsch davent:

La camera «NETATMO presence» sa differenziar tranter persunas, animals e vehichels. Cura ch'in da quels trais passa sin il territori surveglià, survegn ins in messadi sin il telefonin. Vesair subit tgi ni tge exact ch'è avant chasa na ves'ins dentant betg. La camera fa però fotografias ed arcuna quellas sin ina carta en l'apparat. Spezial vid la camera è ch'ins sa inditgar, en tge cas ch'il sistem duai reagir. Na vul ins per exempel betg mintga giada survegnir in messadi, cura ch'in giat passa sper la chasa vi, pon ins eleger ignorar animals.

Sch'ins ha in scalin «Ring Video Doorbell», lura ves'ins direct sin il telefonin tgi ch'è avant chasa e stgalina. Ed ins po schizunt discurrer cun quella persuna. Sch'ins vul dentant era gist avrir l'isch per quella persuna, va er quai. Dentant dovri lura in terz apparat che ha num «NUKI». Quai è in apparat ch'ins montescha dadens l'isch direct vid la clav. Il pachet basic da quai sistem lubescha simplamain davrir l'isch cun il telefonin enstagl da la clav – quai funcziuna cun bluetooth. Supplementar datti ina «NUKI bridge» ch'ins sa colliar cun il WLAN. Ed uschia survegn ins la pussaivladad, d'avrir l'isch era sch'ins è lunsch davent.

Autur/a: Onna Riedi