Digitip – Traffic per las ureglias

Avis da traffic aud'ins suenter las novitads dal Radio Rumantsch, ed era sin auters emetturs da radio. E da nov pon ins era tadlar sin in'app, cura che colonnas ed accidents disturban il traffic.

Tadlar la situaziun dal traffic cun l'app dal TCS
Legenda da maletgs: Tadlar la situaziun dal traffic cun l'app dal TCS MAD

Da tadlar èn ils avis da traffic sin lapp dal TCS, il Touring Club svizzer. Els vegnan preparads en collavuraziun cun la firma Viasuisse – ses collavuraturs legian ils avis e furneschan quels al TCS.

Semtgar avant che duvrar

Ils emprims pass fan ins il meglier a chasa, e betg en l'auto. En l'app dal TCS pon ins endrizzar pliras preferenzas en la rubrica «Audio Bulletins». Pussaivel èsi da tadlar ils avis da traffic per tudestg, per franzos e per talian. Tgi che vul survegn novitads da push, che fan attentas cura che novs avis pledads arrivan.

E tgi che va adina las medemas uras a lavurar, po endrizzar ch'ils pushs arrivan mo tscherts dis e mo durant tschertas uras. Per exempel la damaun durant ir a la lavur, e la saira cun returnar a chasa.

Co ils avis pledads persvadan

Mintga giada chi dat ina nova annunzia da traffic da l'app dal TCS, arriva era ina novitad da push. Per lura udir l'avis, ston ins dar in curt cuc sin il visur per activar ed udir l'avis.

L'idea da questa funcziun nova persvada, igl è bun da betg pli stuair leger ils avis da traffic giu dal visur. Lempermischun ch'ins na stoppia betg pli dar in'egliada sin il visur, nè dentant betg da tegnair. E durant ils temps da colonnas la damaun e la saira, n'èsi betg uschè simpel d'avair la survista da tut ils avis da traffic ch'arrivan.

Autur/a: Alexi Baselgia