Digitip – T'imaginescha: seser en il tren senza canera!

Ti na vuls betg pli stuair udir il baterlim dal visavi en il tren? Lura dovras uregliers cun «noise cancelling».

Ils uregliers vesan ora sco usità.
Legenda da maletgs: Ils uregliers vesan ora sco usità. dpa-tmn/av

«Noise cancelling» – quai è la tecnica che stizza a moda electronica la canera enturn tai. Tgi che porta uregliers cun quella funcziun auda nagut dal conturn e po tadlar musica senza stuair rinforzar il volumen. I dat uregliers che cuvran l'ureglia (over-ear) e da quels cun in nuf en l'ureglia (in-ear). Interessanta è cunzunt la controlla da la funcziun: cun tegnair il maun vid in ureglier, sa tschenta la funcziun da «noise cancelling» ora automaticamain. In discurs cul visavi è pia pussaivel senza stuair prender giu l'entir ureglier.

Over-ear – Grond, cumadaivel e da meglra qualitad


Models che cuvran l'entira ureglia en savens confortabels da purtar. Tar ina cumpra vali da guardar sin la paisa e schebain ins sa faudar els bain. L'avantatg dals models in zichel pli gronds è che l'electronica necessaria per ina fitg buna qualitad da tun po vegnir zuppada senza bregias.

In-ear – pign e lev, però tuttina main cumadaivel


La fiera porscha era models in-ear cun la funcziun da «noise cancelling» Els èn bain pli levs, dentant n'han ils producents betg chattà ina buna soluziun nua zuppar l'electronica e la plipart dals models na funcziunan betg sur bluetooth, cunquai ch'era l'accu drova ses plaz. Pertutgant il tun tegnan ils models in-ear petg als models over-ear.

Autur/a: Yvonne Simmen