Digitip – «Shpock» e «Tradono» – fieras da plugls digitalas

La primavaira n'è betg mo il temp per prender ora il gril e far curtin, mabain savens er ina buna chaschun per nettegiar e far urden puspè ina giada endretg. «Shpock» e «Tradono» duas applicaziuns per il telefonin pon gidar da vender rauba ch'ins na dovra betg pli.

App Shpock
Legenda da maletgs: Ina furma da martgà da plugls digitala - l'applicaziun «Shpock» mad / Shpock

Cun las duas applicaziuns pon ins vender e cumprar rauba da tuttas sorts - davent da mobiglias, sur vestgadira fin tar autos e computers. «Shpock» e «Tradono» datti per iPhone ed Android e quai gratuitamain.

Cuntrari ad autras applicaziuns u plattafurmas sco Riccardo, Ebay ed autras na custi qua nagut per sa registrar. Ins po s'annunziar sur il conto da Facebook, Google ubain via mail ed sms.

Omaduas applicaziuns porschan la funcziun da far directamain fotografias e publitgar sur il telefonin. Cumpraders pon tschertgar offertas damanaivel dad els. Per 2 fin 10 francs pon ins er promover las atgnas offertas, uschia che quellas cumparan pli aut en la glista dals interessents.

Be pitschnas differenzas

Tranter las duas applicaziuns datti be pitschnas differenzas. Tar Tradono ves'ins sin l'emprima egliada il pretsch e quant lunsch davent ch'il vendider è. Tar Shpock ves'ins be il maletg dal product ed il pretsch. Per dapli informaziuns ston ins cliccar sisura. Shpock metta anc in zic dapli paisa sin la communicaziun tranter vendider e cumprader. Quai cun ina furma da commnicar sco tar Whatsapp ni l'applicaziun da messadis.

Autur/a: Gion Gieri Flepp