Digitip – «Maps Me»: orientaziun cun in'applicaziun

En in pajais ester han ins cunzunt l'entschatta pauca orientaziun e va magari a perder. E quai po lura bain ruinar la luna da vacanzas. L'applicaziun «Maps Me» duai evitar quai.

Agid digital per betg ruinar la luna da vacanzas.
Legenda da maletgs: Agid digital per betg ruinar la luna da vacanzas. Pixabay

«Maps Me» funcziuna fitg sumegliant sco Google Maps. Ins inditgescha a l'applicaziun simplamain l'adressa e l'applicaziun furnescha la ruta tar quai lieu. L'agen lieu marchescha l'applicaziun cun ina guglia, uschia ch'ins po controllar, sch'ins va en la dretga direcziun e quant lunsch davent che la finamira è. E quai funcziuna tut offline, damai senza internet. Sulettamain per chargiar giu la carta dovran ins internet. Quai pon ins dentant er far avant che partir en il pajais ester u en in lieu ch'ins ha wifi.

E sch'ins na en vacanzas gnanc nua ch'ins vul ir, mabain mo ch'ins vul ir a mangiar, ir a baiver insatge, a guardar attracziuns turisticas u sch'ins dovra meds da transport u bancomats, lura mussa l'applicaziun nua ch'i dat pussaivladads il pli manaivel.

Pli ch'ina applicaziun sin il martgà

«Maps Me» n'è dentant mo ina da las applicaziuns gratuitas cun talas u sumegliantas funcziuns. Alternativas fissan per exempel «Here we go» u «Navmii». Differentas èn las applicaziuns cunzunt quai che pertutga il design. Uschia che la decisiun è forsa er in pau ina chaussa dal gust.

Autur/a: Nora Baltermia